John 4

Yeisu yo Sameliya waihiuna yadi velaulobaloba

1Yeisu yana abiye bapitaisowena ana taumulitao bagibagilidi ilolobaidine na Yoni ana taumulitaone nigele bagibagilidi. 2Na Yeisu nigele iyaꞌabiꞌabiye bapitaiso, na ana taumulitaone hibom hipaipaihowaine. 3Eeta Yeisu bada ihanapuiyaꞌo ebeha Palisiwone bada Yeisu yana paihowaone wasana hibenalenaꞌo, ta Yudeya ilaugabaei habi wuyouyo Galili ainai.

4Na yana hauga wuyouyo ainai, Sameliya dalavanaone ahiꞌahipudiyena ilalaune, 5ta Sameliya dalavana ehebo yehanaede Saika ainai ibwabwalenine. Saika ainaena baleꞌuwa mwalona Yakobo natuna Yosepa imomoheiwa nigele amwaha daodao. 6Dalavane ainai ehebo weꞌaha eli imiyamiya, iya Yakobo ana eliꞌeli, na Yeisu ilau ta mahana alaꞌalapwahiyai ibwabwalenine tupwanane ainai, na amnanane hiyababa ta imiya gabaei habi aiyawasi.

7Hauga muhamuhana ainai na ehebo Sameliya waihiuna ibwabwalenine habi weꞌaha goi na Yeisu waihiunane iꞌita ta ainai iꞌaꞌawanoine iwalo, ꞌWaihiu weꞌaha umohegau ta yanumaꞌ. 8Tenem hauganane ainai Yeisu ibom imiyamiya wuwuna ana taumulitaone bada hilaoꞌo dalava mwalaꞌina ainai adi tamahina habi gimwala.

9Tenem ainai waihiune iwawalone Yeisu ainai, iwalo, ‘Uꞌita, owa Yudeya towahona na yau Sameliya waihiuna na hava wuwuna ta uꞌaꞌawa weꞌahane aliguwai?’ (Wuwuna Yudeya na Sameliya nigele hiyaꞌawa heliheliyam.)

10Eeta Yeisu iwawalone waihiune Sameliyaenane ainai iwalo, ‘Ebe uhanapui Yaubada yana velaune alimwai yo hinage ebe uhanapuiyaꞌo ebeha yau yaiya ilowoinanego na uꞌawanoiyegau ta weꞌaha yawahim vehabana yamohego’.

11Ainaena waihinane iwalo, ‘Taubada nigele yam vedigolo na hinage weꞌaha eline idobi alili. Na havaena mata weꞌahane umohegaune yawahi vehabana? 12Moiha owa tubudane Yakobo umwalaꞌi gabaei? Yakobo iya weꞌaha eline teina ipapaihowaine ta mwalona natunaone yo yadi lagulaguwone weꞌahanane yadi abanuma.’

13Na Yeisu iwawalone waihiune ainai iwalo, ‘Ebe yaiya teina weꞌahane ainaena inuma mata gadona imaguniuyo, 14na ebe yaiya teina weꞌahane aliguwena inuma nigele howahowana mata gadonane iyamaguniuyo. Wuwuna ebe weꞌahanane yamohei iya atenai ivebidala ta ebe yawahi miyamiya vateyaina ilobai ainaena.’

15Na waihiune Yeisu ainai iwalo, ‘Taubada, weꞌahanane umohegau, ta ebe havena gadogune imagumaguni yo havena yawuyouyoma teina weꞌahane ainai habi goiuyo’.

16Na Yeisu iwalo, ‘Ulau, mwanemne ulauvaiyama’.

17Na waihiune iwalo, ‘Yau nigele teya mwanegu’.

Yeisu hinage iwalouyo, iwalo, ‘Neta walo moiha ebeha nigele teya mwanem, 18na hesi owa mwanemwone adi bagibagili 5, na towahone utatawaholaine ta baidam ammiyamiyane dalavai nigele mwanem moiha. Na hava uwawaloweine neta walo moiha.’

19Tenem ainai waihiune Yeisu yana walo iyemaiha ta iwalo, ‘Taubada bada yahanapuigoꞌo owa teya tauwalo mahalava. 20Eeta uwalo moiha aliguwai aiteya tupwa ainai Yaubada ana walovetuvehae ilowoinaneine? Wuwuna ai tubumaiyaone aidiyena ta wau teina, Sameliya oyanane ainai atapwatapwalolone, na omiu Yudeyaone amwalo ebeha Yelusalem abatapwalolo moiha.’

21Eeta Yeisu waihiune yana walone iyemaiha iwalo, ‘Waihiu, yagu walone uyemidiyei wuwuna hauga ilalaoma ainai mata tomowao nigele howahowana Yaubada ainai hitapwalolo teina Sameliya oyanane ainai bo Yelusalem ainai. 22Howahowana uhanapui ebeha omiu Sameliyaone nigele amyahanapui yaiya ainai amtapwatapwalolone, na ai Yudeyaone hesi ahanahanapui yaiya ainai atapwatapwalolone wuwuna Taulivahine alimaiyena ibwabwalenimane. 23Na hauga teina bada ibwalenimaꞌo ta hiya Tamadane ana tautapwalolo moihadi ainai hitapwalolo ta yadi tapwalolone aluꞌaluwadi maudoina ainaena yo hinage walomoiha ainaena. Yaubada tomowa teina dova ibehabehaedi. 24Yaubada iya aluꞌaluwa na yaiyadiwo hiya ainai hitapwalolo, aluꞌaluwadi maudoina yo hinage walomoiha ainaena hitapwalolo.’

25Na waihiune Yeisu ainai iwalo, ‘Bada yahanapuiyaꞌo ebeha howola mata Besinana towahona ilaoma, iya hiyoyogaeine Keliso, na ebe ilaoma iya hanapu maudoina mata iwalo mahalavae alidai’.

26Na Yeisu waihiune ainai iwalo, ‘Yau Besinanaede teina yawalowalowane’.

27Tenem hauganane ainai Yeisu ana taumulitaone hiwuyoma ta yadi taubadane hiꞌiꞌitane waihiu baidana hiꞌauꞌaubabada, ta aluwadine igagavaine, na hesi nigele teya yaiya iyawalo, ‘Hava nuwanuwam?’ bo ‘Hava wuwuna waihiune baidam amꞌauꞌaubabadane?’

28Eeta waihiunane yana abagoi ilaugabai ta ilau dalavai ta tomowaone aidiyai iwawalone, 29iwalo, ‘Amlaoma na towahonane amꞌita, iya mumugagune maudoina vehabana aliguwai iwalo mahalavediꞌo. Eeta teina iya Besinana towahona.’ 30Ta tomowaone dalava mwalaꞌina ainaena hibwalenima ta Yeisu ainai ilalaomane. 31Hauganane ainai Yeisu ana taumulitaone hiveveꞌiꞌimanei hiwalo, ‘Tauveꞌita, teina aiꞌaine uꞌai’.

32Ta yadi walone iyemaiha na iwalo, ‘Agune nigele amyahanapui.’

33Ta ana taumulitaone hibom hiꞌauꞌaubabada, hiwalo, ‘Nuwana yaiya ana ilawenamaꞌo?’,

34Na Yeisu aidiyai iwalouyo na iwalo, ‘Agu wede neta agu tauvetamalene yana nuwatuwu yaꞌabigabaedi’. 35Na hinage aidiyai iwalo, ‘Yami walo ehebo imiyamiya ebeha waiꞌena vehopali hiꞌovi na abo laulau eli, na yawalo moiha alimiyai amꞌita gwaipile na tanovine ana itane amꞌita bada aiꞌaine ihunaꞌo ta ana lowoinane laulau eli ana hauga. 36Yaiyadiwo hiya hilaulauꞌeli adi maiha hilobai, na laulauꞌeline tomowa yawahidi miyamiya vateyaina vehabana. Eeta yaiyadiwo hiya hilalaupeliwa na yaiyadiwo hiya hilalauꞌeline hiyaliyaya oviꞌovi. 37Teina walone walo moiha ebeha towaho ehebo taulaupeli na towaho ehebo taulauꞌeli. 38Yau yavetamalegomiu laulauꞌeli vehabana ta tomowa amtanoidi. Tomowa tupwadi mwalona hilaupeli na hiꞌabiye masele na omiu amlauꞌeli.’

39Tenem dalavanane ainai Sameliyaone bagibagilidi Yeisu hiyemidiyei wuwuna waihiunane aidiyai iwalo mahalava iwalo, ‘Mumugagu maudoina iwalo mahalavaedi’. 40Eeta Sameliyaone hilaoma Yeisu ainai ta hiꞌawanoiyei ebeha baidadi himiyamiya ta Yeisu nemai ahubena bwau aidiyai imiyamiya. 41Na hinage tomowa bagibagilidi Yeisu hiyemidiyei yana walone vehabana.

42Na waihiunane ainai hiwalo, ‘Yam walone ainaena aꞌawa moihaꞌo, nigele ebeha yam walo aꞌava vehabadi na hesi ai ibom yana walone abenalenaꞌo na ainaena ahanapui iliꞌilimaniyaꞌo ebeha iya Taulivahinaede taumiya baleꞌu maudoida vehabada’.

Yeisu ehebo tauloina natuna iꞌabiye namwanamwa

43Ahubena bwau hiꞌovi ta Yeisu tenem tupwane ilaugabaei ta ilalaune Galili. 44Ta Yeisu yana aubabada tenem dova iwalo, ‘Tauwalo mahalavaone nigele teya adi veꞌahihi ebe hibom yadi tupwai higuguguguya’. 45Hauganane ibwaleni Galili ainai, Galiliwone hiyaliyaya yana bwalenine vehabana, wuwuna Buidiꞌwa guyauna Yelusalem ainai hilau ta Yeisu yana paihowa bada hiꞌitayaꞌo guyaune holanai ipapaihowaidine.

46Ta ainaena Yeisu iwuwuyone Kena dalavanane holanai neta Galili tupwanane ainai. Mwalona tupwanane ainai weꞌaha mohili ipaihowai ta iyemala wainine. Tenem ainai ehebo tauloina mwalaꞌina natuna towahona ilovala Kapaneum ainai. 47Hauganane ibenalei ebeha Yeisu tupwa Yudeyaena ilaoma ta Galili ainai imiyamiya, tauloinanane ilau na Yeisu ainai iꞌawanoi iwalo, ‘Howahowana talau Kapaneum na natugu ilovala uꞌabiye namwanamwa, wuwuna muhamuhana na yana hauga iꞌovi’.

48Na Yeisu towahonane ainai iwalo, ‘Omiu alimiyena nigele teya towaho iya yemidiyegau na ebe yagu paihowa wahiwahiyalana ana veꞌiveꞌilala amꞌita, abo amyemidiyegau’.

49Na tauloinane Yeisu ainai iwalo ‘Bada, umwayamwayau ta talau mata dova ta natugune imwalowoi’.

50Na Yeisu iwalo, ‘Uwuyouyo yam vadai ta natumne uꞌita bada inamwanamwaꞌo’.

Na towahonane Yeisu yana walone iyemidiyei ta ilau gwaipileuyone. 51Hauganane yana laugwaipilene ainai yana taupaihowaone ilobaidi ta wasa himomoheine, hiwalo, ‘Natumwa bada ana lovala iꞌoviꞌo’. 52Ta aidiyai ipapanivilane mahana viha ainai natunane ana lovalane iꞌoꞌovine. Na hiya hiwalo, ‘Lavi mahana alaꞌalapwahiyai ana alaꞌalawowoline isasawaline’.

53Ta tauloinawa inuwatuwui tenem hauganane ainai Yeisu iwalo, ‘Natumne bada inamwanamwaꞌo’. Eeta towahonane yana huhuwone baidanao Yeisu hiyeyemidiyeine.

54Teina Yeisu yana paihowa wahiwahiyalana ana veꞌiveꞌilala bwauna hauganane Yudeyaena ilaoma ta Galili ainai ipaipaihowa.